Search

अंग्रेजी नयाँ वर्षमा धार्मीक पर्यटकिय स्थल कालिञ्चोकमा आन्तरीक पर्यटकको घुईचो

अंग्रेजी नयाँ वर्षमा धार्मीक पर्यटकिय स्थल कालिञ्चोकमा आन्तरीक पर्यटकको घुईचो

अजय प्रधान,
बाँपीझ्याला, दोलखा । कोभिडका कारण पर्यटकीय चहलपहल सुनसान भएसँगै निराश बनेका जिल्लाका अधिकांश व्यवसायी अहिले विस्तारै उत्साही देखिन थालेका छन् । बन्दाबन्दीले सुनसान बनेको दोलखा जिल्लाको विभिन्न धार्मीक र पर्यटकीय गन्तव्यस्थलहरु मध्ये अहिले कालिञ्चोक क्षेत्र पर्यटकले भरिभराउ भएको छ ।

अहिलेको अवस्थामा आन्तरीक पर्यटकले भ्रमण गर्ने जिल्लाको मुख्य गन्तव्यस्थल कालिञ्चोकमा ठूलो सख्यामा पर्यटकको चहलपहल भएपछि यहाँका होटेल व्यवसायीहरुमा उत्साह थपिएको हो । अंग्रेजी नयाँ वर्ष २०२१ का अवसरमा रमाउन धार्मिक तथा पर्यटकीयस्थल कालिञ्चोकमा पर्यटकको आगमन भएको छ । विगत दश महिनादेखि सुनसान बनेको कालिञ्चोकको होटल अंग्रेजी नयाँ वर्षका अवसरमा शुक्रबार र शनिबार पूरै भरिभराउ भएका थिए ।

कुरीबाट केवुलकार सरर

दुई दिनको अवधिमा कालिञ्चोक क्षेत्रमा करीब आठ हजार पर्यटक भित्रिएको कालिञ्चोकका होटल व्यवसायी चन्द्र लामाले बताए । दुई दिनमा करीब सात हजार मानिसले टिकट काटेर केबुलकारमार्फत कालिञ्चोक मन्दिरको दर्शन गर्न गएको कालिञ्चोक केबुलकार सञ्चालकले जनाएको छ ।

दोलखाको सदरमुकाम चरिकोटदेखि १७ किलोमिटरको उत्तर दूरीमा यातायातमार्फत सहज तरिकाले कुरी बजारसम्म पुग्न सकिने र कुरीदेखि कालिञ्चोक मन्दिरसम्म केबुलकारमार्फत सजिलै पुग्न सकिने भएको हुँदा ज्येष्ठ नागरिक तथा बालबालिकालाई समेत सहज भएको छ ।

हिमाली जिल्ला दोलखा तराईका जिल्लासँग छोटो दूरीको सडक सञ्जालमार्फत सहज तरिकाले जोडिएसँगै कालिञ्चोक क्षेत्रमा तराई मूलका पर्यटकको सख्या बढ्दै गएको पाइन्छ । राजधानी काठमाडौँ तथा तराईसँग सहजै छोटो दूरीमा सडक सञ्जालले जोडिएका कारण कालिञ्चोक क्षेत्रमा तराई तथा भारतीय मूलका पर्यटकको सख्यामा पनि वृद्धि हुँदै गएको स्थानिय व्यवसायीहरुको भनाई रहेको छ ।

पर्यटनलाई लक्षित गरी करोडौँको लगानीमा कालिञ्चोकको कुरी क्षेत्रमा सञ्चालनमा आएका सयौँ होटल लामो समयदेखि बन्द हुँदा व्यवसायी चिन्तित बनेका थिए । पर्यटकको चहलपहल शुरु भएसँगै व्यापार व्यवसायसमेत सञ्चालन हुने भएको हुँदा आफूहरु उत्साहित भएको त्रिपुरा रिसोर्टका सञ्चालक चन्द्र लामाले बताए । कुरी क्षेत्रमा पर्यटकलाई लक्षित गरी सुविधा सम्पन्न करीब एक सय होटल सञ्चालनमा रहेका छन् ।

आन्तरीक पर्यटकका रुपमा घुम्न गएका युवा युवतीहरु हिउँमा मज्जा लिर्दै

पर्यटकको माग सम्बोधन गर्ने गरी कालिञ्चोक क्षेत्रमा मात्र तीन हजार ५०० देखि चार हजारसम्म पर्यटक सहजै व्यवस्थापन गर्न सकिने गरी होटल सञ्चालनमा रहेको होटल सुनपातीका सञ्चालक व्यवसायी हरि ओलीका भनाई रहेको छ ।

समुन्द्र सतहबाट तीन हजार १३ हजार ६ शय २ फिटको उचाइमा रहेको कालिञ्चोक भगवतीको मन्दिरमा दर्शन गर्न तथा हिउँमा रमाउनका लागि पर्यटक कालिञ्चोक पुग्ने गर्दछन् । हिउँदका समयमा अधिकांश समय हिउँ पर्ने भए पनि तर यस वर्ष जिल्लाको अधिकांश क्षेत्रमा हिमपात भएको छैन ।

हिउँदका समयमा प्राय हिँउ पर्ने हुँदा हिउँमा खेलिने साहसिक खेल स्की खेल्नका लागिसमेत पर्यटक कालिञ्चोक क्षेत्रमा पुग्ने गर्दछन् । यस क्षेत्रबाट हिउँको रमाइलोसँगै गौरीशङ्कर हिमाल, रोल्वालिङ हिमश्रृङ्खला लगायत विभिन्न क्षेत्रको अवलोकन पनि गर्न सकिन्छ ।

Written by 

Related posts

Leave a Comment

error: Content is protected !!