१८ कार्तिक, बाँपीझ्याला, एजेन्सी । इन्डियन प्रिमियर लिग (आईपीएल) टी-ट्वान्टी क्रिकेट अन्तर्गत लिग चरणको अन्तिम खेलमा आज मुम्बई इन्डियन्स र सनराइजर्स हैदराबादले प्रतिस्पर्धा गर्दैछन ।
साविक विजेता समेत रहेको मुम्बई र हैदराबादबीचको खेल सारजाहमा हुनेछ । मुम्बई र हैदराबादबीचको खेल नेपाली समय अनुसार ७:४५ बजे सुरु हुनेछ ।
सारजाह क्रिकेट मैदानमा दुबै टिम जित निकाल्ने लक्ष्यसहित मैदान उत्रने छ । तर, मुम्बईका लागि भन्दा यस खेल हैदराबादका लागि महत्वपूर्ण रहेको छ ।
प्ले अफ पुग्ने लक्ष्य लिएको हैदराबादलाई मुम्बईविरुद्ध जितको विकल्प छैन । मुम्बईलाई हराउँन सके हैदराबाद प्ले अफमा पुग्नेछ । पराजित भएमा हैदराबादको आईपीएल यात्रा सकिने छ ।
हैदराबाद १३ खेलमा १२ अंक जोडेर पाँचौं स्थानमा रहेको छ । मुम्बईलाई हराउँन सकेमा हैदराबादले कोलकाता नाइट राइडर्सलाई नेट रन रेटमा पछि बनाएर प्ले अफ पुग्नेछ ।
कोलकाता १४ खेलमा १४ अंक जोडेर चौंथो स्थानमा रहेको छ । कोलकाताको प्ले अफ यात्रा समेत यसै खेलले निर्धारण गर्नेछ ।
मुम्बईले जित निकालेको खण्डमा कोलकाता प्ले अफ पुग्नेछ ।
यता, मुम्बई भने शीर्ष स्थानमा रहेर क्वालिफायर पुगीसकेको छ । मुम्बईले १३ खेलमा १८ अंक जोडेको छ ।
त्यसैले मुम्बईका लागि यस खेल प्रतिष्ठाको लडाई मात्र हुनेछ । तर, मुम्बई हैदराबादलाई हराएर लिग चरणको सुखद अन्त्य गर्न चाहन्छ।
