Search

भिएना आक्रमणः छवटा फरक स्थानमा ‘आतङ्कवादी’ हमला

भिएना आक्रमणः छवटा फरक स्थानमा ‘आतङ्कवादी’ हमला

१८ कार्तिक, बाँपीझ्याला, एजेन्सी । अस्ट्रियाको राजधानी भिएनास्थित प्रहरीका अनुसार एउटा आतङ्कवादी हमलामा दुईजना मारिएको पुष्टि भएको छ र अन्य १४ जना घाइते भएका छन्।

एकजना आक्रमणकारी पनि मारिएको बताइएको छ।राइफलसहित आएका व्यक्तिहरूले छवटा फरक स्थानमा गोली चलाउन थालेको प्रहरीले जनाएको छ।प्रहरी र आक्रमणकारीहरूबीच गोली हानाहान भएको अनलाइनमा पोस्ट गरिएको भिडिओमा देखिन्छ।

घटनालाई अस्ट्रियाका चान्सलर जेबास्टियन कुर्ट्सले एउटा “घृणित आतङ्कवादी हमला” भनेका छन्।

सुरक्षा जाँच
एक हमलाकारी मारिएको र अर्का एकलाई पक्राउ गरिएको प्रहरीले जनाएको छ। कम्तीमा अर्का एकजना आक्रमणकारीको खोजी भइरहेको बताइएको छ।

एउटा स्थानीय पत्रिकाका अनुसार घाइतेमध्ये यहुदीहरूको प्रार्थनास्थल सिनागगको सुरक्षा गरिरहेका एक सुरक्षाकर्मी पनि रहेका छन्।सामाजिक सञ्जालमा राखिएको भिडिओ फूटेजमा गोली चलिरहँदा मानिसहरू भागिरहेको देखिन्छ।

स्थानीय बासिन्दालाई सार्वजनिक ठाउँमा ननिस्किन र यातायात प्रयोग नगर्न भनिएको छ।प्रहरीले एउटा प्रतिआतङ्कवादी कारबाही शुरू गरेको विवरणमा जनाइएको छ।

“पटाका पड्केको जस्तै सुनिएको थियो, पछि गोली चलेको थाहा भयो,” एक प्रत्यक्षदर्शीको भनाइलाई राष्ट्रिय प्रसारक ओआरएफले उद्धृत गरेको समाचार संस्था एएफपीले जनाएको छ।

मध्य भिएनाको ठूलो क्षेत्रलाई सुरक्षाकर्मीले घेरा हालेका छन्।चेक गणतन्त्रका प्रहरीले अस्ट्रियासँगको सिमानामा सुरक्षा जाँच शुरू गरेको जनाएका छन्।

कसले के भने ?
युरोपेली नेताहरूले भिएना हमलाबारे सुनेर स्तब्ध भएको बताउँदै आक्रमणको भर्त्सना गरेका छन्।

युरोपेली परिषद्‌का अध्यक्ष चार्ल्स मिशेलले जीवन र मानवीय मान्यताको उल्लङ्घन गर्ने एउटा कायरतापूर्ण हमला भएको बताएका छन्।

फ्रेन्च राष्ट्रपति एमानुएल माक्रोँले अस्ट्रियाका मानिसहरूको पीडामा आफ्नो मुलुक साथमा रहेको प्रतिक्रिया दिएका छन्। युरोपले हार नमान्ने आफूहरूका साझा शत्रुहरूले बुझ्नुपर्ने उनले टिप्पणी गरे। डच प्रधानमन्त्री मार्क रुटले आक्रमणलाई एउटा जघन्य कार्य भनेका छन्।

जर्मन र इटालियन सरकारले युरोपमा देखिएको घृणाको विरोधमा अभिव्यक्ति दिएका छन्। ब्रिटिश प्रधानमन्त्री बोरिस जोन्सनले घटनाबारे सुनेर आफू निकै स्तब्ध भएको बताएका छन्।

मल्टिमिडिया ग्यालरी

Written by 

Related posts

Leave a Comment

error: Content is protected !!