Search

मनिषको उत्कृष्ट ब्याटिङमा हैदराबादको सानदार जित

मनिषको उत्कृष्ट ब्याटिङमा हैदराबादको सानदार जित

०७ कार्तिक, बाँपीझ्याला, एजेन्सी । मध्यक्रमका ब्याट्सम्यान मनिष पान्डेको उत्कृष्ट प्रर्दशनमा सनराइजर्स हैदराबादले इन्डियन प्रिमियर लिग (आइपिएल) को ४० औं खेलमा राजस्थान रोयल्सलाई ८ विकेटले पराजित गरेको छ ।

जितको लागि १ सय ५५ रनको विजयी लक्ष्य पछ्याएको हैदराबादले १८.१ ओभरमा २ विकेटको क्षतिमा जित हासिल गर्यो । हैदराबादको जितमा मनिष पान्डे ४७ बलमा ४ चौका र ८ छक्का सहित ८३ रनमा अविजित रहे । विजय शंकर ५१ बलमा ६ चौका सहित ५२ रनमा अविजित रहे ।

कमजोर सुरुवात गरेपनि तेस्रो विकेटका लागि मनिष र विजयले १ सय ४० रनको अविजित साझेदारी गर्दै जित पक्का गराए । तीव्र गतिका बलर जोफ्रा आर्चरले पहिलो ओभरको चौथो बलमा डेभिड वार्नरलाई चार रनमा दोस्रो स्लिपमा बेन स्टोक्सबाट उत्कृष्ट क्याच आउट गराएका थिए ।

आर्चरलेनै तेस्रो ओभरको चौथो बलमा अर्का ओपनर जोनी बेयरस्टोलाई १० रनमा बोल्ड आउट गरे । तर अन्य बलरले विकेट लिन नसक्दा मनिष र विजयले उत्कृष्ट साझेदारी गर्दै सहज जित दिलाए । राजस्थानका आर्चरले ४ ओभरमा २१ रन खर्चेर २ विकेट लिए । अन्य कुनै पनि बलरले विकेट लिन सकेनन् ।

त्यसअघि दुबई इन्टरनेशनल क्रिकेट स्टेडियममा टस हारेर ब्याटिङ थालेको राजस्थानले निर्धारित २० ओभरमा ६ विकेटको क्षतिमा १ सय ५४ बनाएको थियो । राजस्थानले पहिलो विकेट चौथो ओभरको तेस्रो बलमा गुमाएको थियो ।

नन स्ट्राइकका ओपनर रोबिन उथप्पा रन लिन क्रिजको मध्यभागसम्म दौडिएपनि बेन स्टोक्सले पूरा हुने नदेखेपछि नलिन आग्रह गर्दा फर्किने क्रममा जेसन होल्डरको डाइरेक्ट थ्रोमा १९ रनमा रन आउट हुन पुगेका थिए ।

उथप्पाले १३ बलमा २ चौका र १ छक्का प्रहार गरे । दोस्रो विकेटका लागि बेन स्टोक्स र सन्जु स्यामसनले ५६ रनको साझेदारी गर्दै इनिङ अगाडि बढाउन खोजेका थिए । १२ औं ओभरको चौथो बलमा होल्डरले स्यामसनलाई ३६ रनमा बोल्ड आउट गरे ।

स्यामसनले २६ बलमा ३ चौका र १ छक्का प्रहार गरे । १३ औं ओभरको पहिलो बलमा स्पिनर राशिद खानले बेन स्टोक्सलाई ३० रनमा बोल्ड आउट गरेपछि हैदराबाद खेलमा फर्किएको थियो । स्टोक्सले ३२ बलमा २ चौका प्रहार गरे ।

विजय शंकरले १६ औं ओभरको तेस्रो बलमा जस बटलर ९ रनमा शहबाज नदीमबाट क्याच आउट हुन पुगे । होल्डरको १९ औं ओभरको पहिलो बलमा ठूलो सट खेलेका कप्तान स्टिभ स्मिथ लङअनमा मनिष पान्डेबाट १९ रनमा समातिन पुगे ।

स्मिथले १५ बलमा २ चौका प्रहार गरे । अर्को बलमा रियान पराग डेभिड वार्नरबाट २० रनमा क्याच आउट हुन पुगे । परागले १२ बलमा २ चौका र १ छक्का प्रहार गरे । जोफ्रा आर्चर १६ र राहुल टेवाटिया २ रनमा अविजित रहे । आर्चरले ७ बलमा १ चौका र १ छक्का प्रहार गरे ।

जारी सिजनमा पहिलो खेल खेलेका हैदराबादका अलराउन्डर जेसन होल्डरले ४ ओभरमा ३३ रन खर्चेर ३ विकेट लिए । राशिद खानले ४ ओभरमा २० रन खर्चेर १ विकेट लिए । विजय शंकरले ३ ओभरमा १५ रन खर्चेर १ विकेट लिए ।

राजस्थानले अव आइतबार मुम्बई इन्डियन्ससँग खेल्ने छ । हैदराबादले शनिबार किंग्स इलेभेन पन्जाबसँग खेल्ने छ ।

Written by 

Related posts

Leave a Comment

error: Content is protected !!